खाकी वर्दीसाठी तिने प्रयत्न केला पण अपयश आलं, आता प्रियांका थेट PSI झाली – News18 लोकमत

पोलीस भरतीत यशाची हुलकावणी बामणोली या छोट्याशा खेडेगावातून महिला पोलीस उपनिरीक्षक होऊन प्रियांकाने मिरज तालुक्याच्या शिरपेचात मानाचा तुरा रोवला आहे. प्रियंका राष्ट्रीय आणि आंतरराष्ट्रीय सायकलपटू आहे. तिची खाकी वर्दी मिळवण्याची महत्त्वाकांक्षा होती. त्यासाठी तिनं पोलीस भरती परीक्षेतही प्रयत्न केला. मात्र, त्या ठिकाणी हुलकावणी मिळाली. शेवटी अभ्यास करून अधिकारी होण्याचा निश्चय तिनं केला. अखेर प्रियांका पीएसआय झाली. निकाल लागल्यावर प्रियंकाची बामणोली गावातून भव्य मिरवणूक काढण्यात आली. कर्ज काढून घेतली सायकल घरची परिस्थिती बेताची होती. मात्र, सायकलिंगच्या मोठ्या स्पर्धेत खेळण्याचं स्वप्न होतं. त्यासाठी सायकल घेण्याची आयपत ही नव्हती. सायकल स्पर्धेला जायचे होतं तेव्हा कोणीही मदतीला धावलं नाही. आईचं मंगळसूत्र गहाणवट ठेऊन कर्ज काढण्याची वेळ आली. वडीलांनी कर्ज काढले व सायकल स्पर्धेसाठी दोन लाखाची सायकल घेतली, असं प्रियांकानं सांगितलं.
PSI Success Story: बापाने आयुष्यभर दुसऱ्याच्या शेतात तोडला ऊस, पोरगं आता अंगात घालणार खाकी वर्दी!
आंतरराष्ट्रीय स्पर्धेत चमकदार कामगिरी खूप प्रयत्न पूर्वक सायकल घेऊन आंतरराष्ट्रीय सायकल स्पर्धासाठी गेले. विशेष म्हणजे ती स्पर्धा जिंकली. सामाजिक कार्यकर्ते सतिश मालू यांनीही मोलाची साथ दिली. सायकल स्पर्धांमध्ये सहभागी होत असतानाच स्पर्धा परिक्षेचा अभ्यास केला आणि अखेर यश मिळालं. चांगला अधिकारी होऊन समाजाची सेवा करायची आहे. सामाजिक बांधिलकी जपून शासकीय सेवा करणार अशी माहिती प्रियांका कांरडे यांनी दिली. तिने आपल्या यशाचे श्रेय वडील शिवाजी, आई वैशाली, भाऊ रणजित, बहिण दिपाली आणि नातेवाईक यांना दिले आहे.

मराठी बातम्या, ब्रेकिंग न्यूज मराठीत सर्वात आधी News18 लोकमतवर. आजच्या ताज्या बातम्या, लाइव्ह न्यूज अपडेट, सर्वात आधी वाचा विश्वासार्ह मराठी न्यूज वेबसाइट News18 लोकमतवर.